الأربعاء، 6 أبريل 2011

لما ..

لما تحس إنك مفيش ومش لاقي اللي كان بيميزك
لما تحس إن الإزعاج بقى صوتك .. وتلاقي الكآبة مصاحبة تواجدك
تقوم تتجاهل نفسك مع إن اللي حواليك مش متجاهلينك

لما تشوف فيك اللي بتكرهه في غيرك
تنصح غيرك إزاي بعد كده .. وإنت العيوب كلها بقت  في ديلك

لما تحس إنك غير مفيد
غير مضيف مش جديد
لا بتنام ولا بتاكل .. بتخس وإنت أصلا محتاج تزيد

لما تفتح بقك في أي موضوع وأنت مش عارف عاوز توصل لإيه
تجادل من غير هدف ..ماشي نيتك خير بس تجادل ليه ؟  
يبقى تفضل ساكت وغيرك يتعكنن ؟ .. ولا تتكلم و غيرك يتعصب ؟ .. ولا تتشالب ولا إيه ؟
أنا نفسي مش عارف اللي بكتبه ده إيه  وليه  ..

لما تحس إنك آسف
آسف للي حواليك و آسف لنفسك
حاسس إنك علطول متصربع
مش عارف تفكر علشان ترجع 
اللي حواليك بيساعدوك وإنت مش سامع
نفسك بتستغيث بيك وإنت فاكس ضايع

لما جزء منك يحتجلك وإنت مفيش 
وجزء بيعمل أي حاجة علشان ميشوفكش كده وإنت مفيش 
واجزاء نفسك تسأل عليها بس برده أنت مفيش 
واجزاء بتسأل عليك وإنت بارد ومفيش 

لما تبقى عايز تقول لنفسك  وكل القريبين منك معلش .. =)

لما بقى ..



هناك تعليق واحد:

  1. كإنك ضايع من نفسك
    بتضحك بس مش من قلبك
    بتتنفس ف جسد من غير روح
    اسمك شب و شعرك شاب
    واثق فكلامك و مهزوز من جواك
    تايه خايف وحاسس انك فاضي
    نفسك تعرف ليك لازمة
    و تحس ان رحيلك أزمة
    تعيش من غير خوف
    ف ليل من غير دموع
    و يبقي ليك حلم
    و فاكر ان ليك قلب
    و اتاريه من غير نبض
    كانه صخره ف ضلوعك
    بتتأل من كتر الهم
    بتسأل امتي راح تتحل
    و تعرف لحرتك غاية
    و تعرف إيه الحكاية
    و تعرف ليه دمعتك سهله
    و ان يداس عليك بقي عاده
    وانك تزعل ده اللي مش مقبول
    كإنك اله مبتفهمش
    مطلوب منك تستحمل متنطأش
    تضحك ترضي الكل
    و تهون علي الكل
    وملكش حق ف الشكوة
    وإلا تبقى ناكر للنعمة
    وتخاف تموت و مش عارف تعيش
    وتعيش ميت على الأرض
    كإنك ... معيشتش من الاصل

    ردحذف