الأحد، 9 يناير، 2011

"مَعلِش … فِيْ مُوضَة نِضِيفَة" (2)


أولاً أحب أشكر كل اللي شجعوني إني أكتب تاني وطبعاً ده ينطبق على اللي قالولي مش هعرف أحكم إنت لسة مقلتش حاجة أصلاً ومنهم اللي قال لي لما تبقى تكتب حاجة هبقى أقولك رأي  ولاني اقتنعت شوية برايهم قررت مطولش مدة الفاصل ..الفكرة إنه فعلاً كان لا يعتبر مقال لإنه واضح إنه مقدمة كنت عايز بس أشرح للناس ليه انا فكرت في الكتابة واد  إيه أنا مبسوط إنها موضة ايجابية ابتدت تظهر ويا رب تستمر..  

ندخل بقى في الموضوع ..
على مدار السنين اللي فاتت والعصور اللي مصر عدِّت عليها في القرن الاخير من احتلال فرنسي لإنجليزي ل ل ل ومن حكم  ملكي لحكم جمهوري – أعتقد إنه جمهوري على آخر ماسمعت مش فارقة كتير يعني -  ظهرت ألفاظ وكلمات علمانية ليس لها أي أصل في اللغة العربية وفي نفس الوقت ظهر فن أو ممكن نسميها   "موضة" وهي كيفية استخدام كلمة معينة ليها معنى معين للتعبير عن شيء أو شعور ملوش أي علاقة بالمعنى الأصلي للكلمة وللأسف إن الناس وبدون ماتشعر اصبحت تستخدم الالفاظ دي محل الكلام اللي هو المنطقي انه يُستخدم في الموقف وعلى رأي محمد سالم  "الناس بقت بتتعامل بالاحساس وده حقيقي الناس بقت بتتكلم بالكناية أو بكتر استخدام لفظ معين في موقف معين فـفجأة الموقف يركب على اللفظ ويبقوا عادي زي الحمار اللي بتمشيه في طريق كذا مرة لحَد مايحفظه ويمشي فيه لوحده من غير مايفكر مع احترامي الشديد لهذا الكائن الجميل أو الكلب اللي بتعوده على إشارة معينة أو كلمة معينة لما تعملها يعمل حركة معينة برده  " مع احترامي للكلب لإنه حيوان عزيز عليَّ جداوطبعا  حدِّث ولا حرج على كمية الالفاظ العجيبة اللي طلعت ولسة بتطلع ولسة بتخش في مواقف ملهاش علاقة بيها وللأسف بتلزق في قاموس كل واحد فينا من أول كلمة  ماشي" و ماشي دي كانت كلمة الناس بيتبصلها باستغراب إيه ماشي دي متقول حاضر !! و واحدة واحدة المواقف ركبت على ماشي وبقت ماشي في قاموس اللغة العربية عادي جدا لها معنيين الاول إنها اسم فاعل للفعل يمشي والتاني بمعنى حاضر وشوية شوية اصبحت كلمة حاضر دي بتتقال بس لما تكون بتكلم حد أكبر منك أو عايز تبين إنك محترم .. بس ! وجه بعديها وبالذات في عصرنا ده  عدد لا يحصر من الالفاظ زي قشطة" و"فاكس" وفكك ووووووووو ….

ظهرت في وسط الالفاظ العجيبة اللي ربنا ابتلانا بيها دي أو ممكن نقول إنه كان في بداية ظهور الموضة دي لفظ  معلش" واللي لفت نظري في معلش هو إنها ما شاء الله المجتمع المصري قدِر إنه يوظفها في معظم مواضيعه  حتى اصبحت كلمة سياسية تستخدم في كل زنقة جوكر يعني . فكرت استخدمها في كلامي مش من حبي فيها ولكن بما إننا شعب يتعامل بالاحساس فاتمنى إنكم تفهمو  إحساسي" وأنا بقول معلش .

الحقيقة حاولت على اد مقدر اني أعرف أصل كلمة معلش علشان مبقاش ظالمها وأقول عليها إنها لفظ علماني أو حاجة  ولما دورت وصلت لاجابة اعتقد إنها الاقرب إلى الصواب وهي إن معلش أصلها الاول خالص خالص كانت ماعليه شيء  أو ماعليها شيء فكان مثلا ييجي واحد يشتكي للتاني يقول له" أنا زعلان من فلان" فيقول له "متزعلش ماعليه شيء"..  شوية شوية واللسان المصري ابتدى يستتإل الموضوع . وده طبيعي لإن اللسان المصري بطبعه لزُّوز.. فتحولت ماعليه شيء إلى معلهش وأستخدمت نفس الإستخدام مع بعض تطوير في استخدامها وهو الوصول لمرحلة المواساه .. شوية شوية واللسان اللزوز ابتدى يفرهض من حرف الهه فتحولت معلهش لصورتها الحالية اللي هي معلش" مع بعض الاضافة المستفزة في مواقف استخدامها زي في الاسف أو الإعتذار وتطور استخدامها في حتة المواساه فبقت بتتلزء في جُمل العزاء  زي معلش البقاء لله أو معلش إن شاء الله آخر الاحزان  وفي ساعة المرض معلش ألف سلامة ..

الموضوع كان مش هيبقى مُضِر لو كان كل الناس فعلاً  إكتفت فقط بـإضافة كلمة معلش مع الكلام اللي المفروض بيتقال في بعض المواقف ولكن الناس للأسف ابتدت تستبدل الكلام اللي ليه معنى وتحط معلش وتقفل الكلام على كده ..طبعا أنا مش بعمم ولكن معظم الناس بتعمل كده وأحيانا من غير ماتشعر لمجرد إن معلش اصبح في علاقة حب بينها وبين اللسان اللزوز وممكن واحد يحلل الموضوع ويقولك إن ظاهرة معلش دي كانت سبب في قلة سماع كلام ممكن يكون البني آدم اللي أصادك محتاج يسمعه   الاكثر ضررا بقى من كده وأنا شايف إنه الضرر الحقيقي هو التطور الاول اللي قلت عليه اللي ظهر مع ظهور معلش و هو الأسف البايخ للخروج من زنقة معينة بدايتا من معلش اللي كنا بنقولها لاهلنا لما بنرجع البيت من المدرسة مش اكلين السندوتش  لحد معلش السياسية اللي بنسمعها ومعلش في السياسة عندنا كلمة سياسية لولبية تقدر  تارطس بيها أي حد يزنؤك بـأي سؤال !!وياسلام لما تسمعها طالعة من بؤ مسئول محترم بتبقى نفسك تسمع  توفيق الدقن وهو بيقول : "يا آه يا آه" .

اللي عاوز اوصله هو إن "مَعلِش" و لامؤاخذة يعني..
 معلش مبقتش موضة..
معلش
بقت أمر واقع و مش نضيف ..
بس إن شاء الله
هينضف ..

ملحوظة لازم أقولها  : لم اقصد اهانة اللسان المصري لما قلت إنه لزوز لانه والحمدلله هو اللسان الأكثر حفاظا على الالفاظ العربية مع احترامي لجميع دول الوطن العربي كله !! ولكن أنا قصدت باللزوز إنه لسان مرح مش أكتر...

 اتفرج على محمد سالم (يقال إنه شبهي (بيتكلم عن الكلام البزرميطي  ... J
http://www.youtube.com/watch?v=Dx-CegbHUuU

هناك 3 تعليقات:

  1. ana 3aref enaak mesh hatez3aal meny... :D
    besara7aa.... el mawdoo3 mesh interesting
    ur writing is nice... hit us with more :D

    ردحذف
  2. أكيد مش هزعل منك يا يسري :D
    طبعا أشكرك على رأيك في طريقتي في الكتابةوأشكرك على رايك الصريح برده :D .. بس أنا يا يسري مكنتش بتناول الموضوع على إنه حالة أو ظاهرة عايز احللها حاليا أنا الهدف من ورا المقال ده هو إني بس امهد للناس ليه أنا اخترت "معلش " تبقى عنوان رئيسي لكتابتي فحبيت إني ابتدي بـمقدمة عامة عن فكرة الالفاظ والكلمات اللي بتتحراف وإيه تاثيرها.. وزي ما قلت في نص الكلام إن الضرر اللي أنا شيفه من ورا فكرة الالفاظ أو التحريف ده هو في استخدامها المضر "احنا اللي استخدمناها غلط " ..
    بس هارجع واقولك أشكرك بجد على اهتمامك وعلى رأيك :) واتمنى اللي جي يبقى أفضل ...

    ردحذف
  3. I think the idea is awesome. And thanks for letting us know what ma3lesh means =)

    ردحذف